Saturday, November 21, 2009
GRABE nga gisaway kini si Mayor Boy Radaza sa Syudad sa Lapu-Lapu nga nidawat na lang og limpyo niining pagkahimong lone district sa sa syudad.
Dayon, ngano kuno nga wa hatagi og recognition kini si Kong. Nerry Soon-Ruiz?
Nakasabot ko nganong ingon niini ang dagan sa mga komentaryo kay wa man sab magsaba-saba ang kampo ni Mayor Radaza kon unsay tinuod nga panghitabo ug ang papel sa mayor niining pagpasar sa Senado sa maong balaud.
Kahinumdoman, wa na gyuy nagtuo nga makapasar pa ang balaudnon.
Uyon na man gud unta kini si Sen. Noynoy Aquino, ang kandidato alang sa pagka presidente sa Liberal Party, nga himuong lone district ang Lapu-Lapu apan nisupak man kuno si Sen. Joker Arroyo.
Supak si Sen. Arroyo kay gibabagan man sab ang iyang giduso nga balaudnon aron mahimong distrito sab ang usa ka dapit sa Camarines del Sur nga makatabang sa politikanhong plano sa usa sa mga anak ni Pres. Gloria Macapagal-Arroyo.
Daw stalemate ang kahimtang sa Senado.
Dinhi sab sa Sugbo, gihimong isyo ni Mayor Jonas Cortes sa Syudad sa Mandaue ang pagmugna ni Kong. Soon-Ruiz sa maong balaudnon kay ngano kuno nga Lapu-Lapu man ang giduso ug di ang lone district sa Mandaue.
NANGUNAY
Tungod sa maong kahimtang, nidesisyon kini si Mayor Radaza nga moadto sa kaulohan aron mangunay sa pag-follow up sa maong balaudnon.
Nakumpirmar nako nga lakip gani ang oposisyon nga si Konsehal Ahong Chan nikuyog sa Manila aron motabang sa maong paninguha.
Tuod man, nakakita gyud og paagi si Radaza ug ang mga opisyal sa Lapu-Lapu aron masulbad ang stalemate diha sa Senado.
Nahitabo na lang nga wa na gilumpong ang balaudnon kabahin sa Camarines del Sur ug sa Lapu-Lapu.
Buot ipasabot, wa na mapagan ang balaudnon alang sa lone district sa Lapu-Lapu.
Ug ang naka-magic niining paglusot sa balaudnon samtang ang uban wa gyud mao si Mayor Radaza.
MAKAMAO DIAY
Dihang nakadungog ko sa maong hitabo ug nakumpirmar sa uban pang tinubdan, nakaingon ko nga makamao man diay moduso og balaod kini si Radaza.
Nagpasabot kini nga duna siyay ideya kun unsaon ug duna gyud siyay klaro nga achievement alang sa mga taga Lapu-Lapu.
Hinuon, kini magpasabot nga wa nay labot kini si Kong. Soon-Ruiz sa maong balaod.
Dako kaayo siyag papel. Siya man ang nagsugod niini.
Apan masayang unta ang paninguha ni Inday Nerry alang sa mga taga Lapu-Lapu kon nahutdan pa sa paglaom sila si Mayor Radaza ug wa na mangunay pag-lobby niini sa mga senador.
Ug nalipay ko nga wa gidawo ni Radaza ang pagtabang aron mahimo kining balaod ngadto sa oposisyon.
Di man lang gud pulos tigsuporta sa mayor ang mga taga Lapu-Lapu. Naa man say oposisyon nga nagtinguha sab sa kaayuhan sa tanan sama pananglit kang Konsehal Chan.
