NALIPAY ang kadaghanan sa mga drayber sa traysikol ug multicab ug mga mamaligyaay sa Lapu-Lapu city sa hingpit nang pagbuwag sa Siyudad gikan sa ikaunom nga distrito.
Sigon pa ni Jun Casio, traysikol drayber, nga nalipay sila tungod kay makaayo kini sa Siyudad, labina nga kini highly-urbanized city na.
Mapahimudsan nag maayo niini ang mga serbisyo sa usa ka magbabalaod nga makahigayon sa paggugol sa iyang panahon sa distrito lang.
Kaniadto ang pagtagad sa ilang magbabalaod mabahin sa lima hinungdan nga di tanang mga proyekto maanha kanila.
Mga manindahay nakapanglantaw nga molambo nag maayo ang dakbayan tungod niini.
Matod sa mga manindahay nga di lang gustong nganlan nga nagpaabot sila og maayong mga kalambuan karon nga ang Lapu-lapu usa na ka hingpit nga lone district.
Sa miaging adlaw, gipirmahan na ni Presidente Gloria Macapagal Arroyo ang balaudnon nga naghimo sa Lapu-lapu City nga lone district.
Ang balaod gipangamahanan ni Kong. Nerissa Soon-Ruiz.
Bag-ohay lang kining napalabang sa Senado.
Karong eleksyon sa 2010, ang sixto distrito langkuban na lang sa Siyudad sa Mandaue, Consolacion, Liloan ug Cordova. Czarina Francesca Talon, STC MEDIA INTERN
Gipatik sa mantalaang Sun.Star SuperbalitaCebu sa Oktubre 24, 2009.
