(Banat) Updated October 01, 2009 12:00 AM
CEBU, Philippines - Tubag sa problema sa basura.
Nag-una karon dinhi sa Sugbu sa pagpatuman sa Republic Act 9003 kon Solid Waste Management Act of 2001 ang dakbayan sa Lapulapu nunot usab sa gihingusgang pagpatuman sa Solid Waste Management program ni Mayor Arturo Radaza sa sitio Soong sa barangay Mactan sa maong dakbayan.
Gawas sa pagpahapsay sa paghipos sa basura nakahatag usab og trabaho sa mga job orders ug clean and green program ang pipila ka mga taga Opon.
Ang unang ginang sa dakbayan ug Mactan Barangay kapitan Paz Radaza nga nahinabi sa Banat News kagahapon miingon nga ang Materials Recovery Facility (MRF) makumpleto sa tungatungang bahin sa bulan sa Oktobre niining tuiga.
Si Radaza miingon nga niadto pang tuig 2005 nga gisugdan ni Mayor Arturo Radaza sa pagtukod ang MRF sa sitio Soong sa barangay Mactan ug 90 porsiyento na ang natapos niini.
Matud pa niini ang mga ekipo mobahig sa madunot ug dili madunot nga basura diha sa duha ka ektaryang luna sa nahisgotang lugar, ang madunot nga basura dad-on sa laing ekipo aron kini himuong organic fertilizer ug ang dili madunot galingon sa makina isagol sa gimasang semento aron mahimong mga hollow blocks. (Romeo Limpangog) (BANATNEWS)
