Dunay tinguha sa pagpatay sa mga Radaza?
Posted using ShareThis
PAG-UMANGKON ni Lapu-Lapu City Mayor Arturo Radaza nagdudang siya ang tuyo sa duha ka mga lalake, usa niini giingong armado, nga ning-apil sa Christmas party sa mga barangay worker nga iyang gitambungan niadtong miaging adlaw.
Si Harry Radaza, kinsa nagpapili pagka-konsehal sa dakbayan sa unang higayon sa partido Lakas Kampi ubos sa local party nga Team Diretso, nipatawag og press conference kagahapong adlawa aron pagbutyag niini.
Gumikan sa maong hi-tabo, ang kampo ni Radaza mo-request og security personnel alang kang mayoral candidate Paz Radaza ug Harry sanglit nahulga man ang ilang kinabuhi.
Ang duha ka mga suspek giilang sila si Valeriano Bacalso ug Alfie Gabato, pulos taga-dakbayan sa Toledo ug mang-ayuhay o sapatos.
Atol sa kalingawan niadtong Mrtes sa mga alas 2:00 sa hapon diha sa Lapu-Lapu City Sports Complex niabot ang duruha nga pulos hubog ug nangayo og pagkaon.
Pulong pa sa batan-ong Radaza nga daghan na ang nagduda sa linihokan sa duruha sa dihang namatikdan si Bacalso nga ang tuo nga kamot nagkuot sa iyang belt bag nga nipunit sa natagak nga sud-an.
Gumikan niini, gilayog si Bacalso sa mga supporter ug nasuta nga adunay dala nga .22 caliber magnum revolver diha sa bag.
Sila nagduda nga adunay tuyo sa pagpatay kang Harry sila si Bacalso ug Gabato kay duha ka mga semana nga milabay adunay nadawat nga text message si Harry nga naghulga sa iyang kinabuhi.
Nagtuo siya nga may labot sa politika ang maong hitabo sanglit wa man siyay kontra ug una kining higayon nga nahitabo karon nga nilansar na siya.
Samtang si Mayor Radaza nipasangil nga ang ilang atbang sa pulitika maoy nagpaluyo sa tinguhang pagpatay sa iyang pag-umangkon ilabi na nakuhaan og ID card nga sakop sa Barangay Intelligence Network (BIN) sa Cebu City si Bacalso samtang sakop sa International Guardian Brotherhood si Gabato.
Matod pa sa mayor nga mo-request sila sa Commission on Elections (Comelec) nga mangayo og police escort aron nga kapanalipdan ang ilang seguridad.
Samtang ang hepe sa Lapu-Lapu City Police Office P/Supt. Mariano Natuel Jr. nagkanayon nga base sa ilang initial nga imbestigasyon mga gate crasher ang duruha.
Naghimo sila og background check sa maong mga dinakpan.
Si Bacalso nipasabot nga for self defense ang iyang pagdala sa maong armas nga nakuha sa iyang posisyon.
Niadto sila sa Christmas party aron madungan ug pauli sa ilang mga kaila nga taga-isla sa Olanggo.
Hugtanong gipanghimakak nila ni Bacalso ug Gabato ang pasangil nga aduna silay tinguha sa pagpatay sa pag-umangkon sa mayor.
Gipatik sa mantalaang Sun.Star Superbalita Cebu sa Disyembre 24, 2009.
